Hæfnigreiningar

Fræðslumiðstöð atvinnulífsins (FA) hefur þróað aðferð við að greina hæfni starfa.

Hæfnigreiningin myndar starfaprófíl sem er grunnur að uppbyggingu náms eða raunfærnimats. Greiningin byggir á aðferð sem HRSG (Human Resource Skills Group) í Kanada hefur þróað. FA hefur leyfi frá HRSG til að þýða og staðfæra gögnin auk þess sem regluleg uppfærsla á sér stað. Hæfniþættir sem fram koma eru viðmið um hvaða hæfni þarf til að gegna tilteknu starfi.

Hæfnigreiningar og atvinnulífið

Hæfnigreiningar FA hafa reynst vel enda er aðkoma atvinnulífsins hluti af ferlinu. Lögð er áhersla á að ná samnefnara fyrir störf á vinnumarkaði, innan starfsgreinar en ekki eins fyrirtækis. Með hæfnigreiningu verða hæfnikröfur starfanna sýnilegar og geta þar með stutt við ráðningar og starfsþróun, starfstengdar námskrár sem FA skrifar, og raunfærnimat á móti viðmiðum starfa.

Framkvæmd hæfnigreininga

Sérfræðingar FA leiða hæfnigreiningar í tengslum við viðkomandi starf. Hæfni starfs sem greint er skiptist í almenna starfshæfni og sértæka hæfni sem þarf til að sinna starfinu. Unnið er með hæfniþætti sem skilgreina á hlutlægan hátt þá persónulegu og faglegu hæfni sem máli skiptir á vinnumarkaði. Hæfniþættirnir eru þrepaskiptir og lýsa stíganda í ábyrgð, sjálfstæði og hæfni sem þarf til að gegna starfinu. Þrepaskiptingin styður við hæfniramma um íslenska menntun.

Hvaða leiðir eru í boði við greiningu:

Greiningin fer fram á þremur eða fjórum skipulögðum greiningarfundum. Munur á fjölda funda fer eftir því hverjar afurðirnar skulu vera.

Ef bjóða á uppá á raunfærnimat eða undirbúa nám í tengslum við starfið er fjögurra funda fyrirkomulag valið. Afurðir úr þeirri leið er starfaprófíll, staðsetning starfs á þrep samkvæmt íslenska hæfnirammanum og drög að matslista til raunfærnimats. Að öðrum kosti er þriggja funda fyrirkomulag á hæfnigreiningu og er þá afurðin starfaprófíll og staðsetning starfs á þrep samkvæmt íslenska hæfnirammanum.