Alþjóðleg ráðstefna (VPLBiennale) um leiðir til að gera hæfni sýnilega og raunfærnimat fór fram í Reykjavík dagana 19. og 20. maí sl. Mikil aðsókn var í ráðstefnuna þar sem um 250 þátttakendur frá 27 löndum komu saman til að fá innblástur af erindum og taka þátt í umræðum um þróun raunfærnimats. Um 50 manns fylgdust með ráðstefnunni í streymi. Þetta er fjórða alþjóðlega ráðstefnan sem haldin hefur verið um raunfærnimat.
Þróun raunfærnimats á Íslandi
Hingað til hefur mest verið horft til þess að nýta raunfærnimat til styttingar á formlegu námi. Með örum breytingum á vinnumarkaði vegna fjórðu iðnbyltingarinnar og aukinni þörf á símenntun hefur áherslan, sérstaklega í Norður-Evrópu, á að nýta raunfærnimat til að takast á við þessar breytingar aukist. Svíþjóð hefur verið leiðandi á þessu sviði og á Íslandi hafa SA og ASÍ komið að tilraunaverkefnum um raunfærnimat á móti hæfniviðmiðum starfa. Niðurstöður ráðstefnunnar verða nýttar til að hafa enn frekari áhrif á framþróun raunfærnimats hér á landi.
Að byggja sameiginlegan grunn
Til að það náist sem mestur árangur af raunfærnimati þarf samstaða að ríkja á milli menntakerfis, atvinnulífs og yfirvalda og nauðsynlegt er að allir hagaðilar séu meðvitaðir um mikilvægi raunfærnimats. Þannig næst sem mestur árangur fyrir samfélagið.
Guðmundur Ingi Guðbrandsson, félagsmála- og vinnumarkaðsráðherra, tók undir þetta í erindi sínu á ráðstefnunni og talaði fyrir mikilvægi raunfærnimats til að bregðast við áskorunum á vinnumarkaði. Jafnframt væri hægt að raunfærnimeta fjölbreyttari hópa innan markhópsins og þannig gætum við stuðlað að jöfnum tækifærum fyrir alla.
Árangursrík verkefni verðlaunuð
Fjögur árangursrík verkefni í raunfærnimati hlutu viðurkenningu á ráðstefnunni og var einn íslenskur fræðsluaðili þar á meðal. Verðlaunahafar eru: (1) Dr. Rekha Rambharose, fyrir stuðning við nema sem sækja raunfærnimat í Suður-Afríku; (2) Aleksandra Panek, fyrir vottun á hæfni innflytjenda í Austurríki, (3) Ulrich Scharf, fyrir verkefni um starfsferilsráðgjöf með gervigreind og (4) Starfsmennt, fyrir verkefni í raunfærnimati með starfsfólki í úrvinnslu- og afgreiðslustörfum hjá hinu opinbera. Sjá nánar um verðlaunahafa og verkefnin. Jafnframt var Jens Bjornavold heiðraður fyrir hans framlag í þágu þróunar raunfærnimats.
„Þetta er frábært kerfi og gjörsamlega bjargaði mér“
Jón Gnarr, leikari, uppistandari og fyrrverandi borgarstjóri, flutti erindi á ráðstefnunni þar sem hann sagði frá persónulegri reynslu sinni af raunfærnimati og hvernig raunfærnimatið hefði verið valdeflandi fyrir hann. Jón Gnarr mætti í Síðdegisútvarpið eftir ráðstefnuna þar sem hann hrósaði raunfærnimatskerfinu á Íslandi. Nálgast má viðtalið og lesa frétt um það á RÚV.
Umsjón og styrktaraðilar
Ráðstefnan var í umsjón Fræðslumiðstöðvar atvinnulífsins (FA) í samstarfi við Norræna tengslanetið um nám fullorðinna (NVL) og CEDEFOP. Fulltrúar EC-VPL, Evrópusambandsins, UNESCO, GLOBEDU og Sænska landsskrifstofan fyrir fagháskóla (MYh) tóku einnig þátt í stýrihópi til að undirbúa ráðstefnuna og styðja við árangursríkar niðurstöður. EPALE, innlendir starfsmenntasjóðir og félagsmála- og vinnumarkaðsráðuneytið styrktu ráðstefnuna með fjárframlögum. FA þakkar styrktaraðilum kærlega fyrir þennan ómetanlega stuðning.
Efni af ráðstefnunni er væntanlegt á heimasíðu Biennale s.s. kynningarglærur, upplýsingar um fyrirlesara, upptökur af kynningum aðalfyrirlesara. Nálgast má greinar um raunfærnimat í veftímaritinu Gátt.