Fræðsluaðili sækir um til Fræðslumiðstöðvar atvinnulífsins (FA) á sérstöku eyðublaði. Verði umsókn samþykkt er gerður samningur milli FA og fræðsluaðila og FA sendir fræðsluaðila gögn vegna vottunarinnar.
Eftir undirritun samnings og greiðslu árgjalds sendir FA umsóknina til matsaðila sem FA hefur valið sem úttektaraðila og gert samning við þess efnis.
Fræðsluaðili fyllir út EQM sjálfsmatseyðublöð.
Matsaðili og fræðsluaðili skipuleggja úttekt og ákveða í sameiningu dagsetningu vottunarheimsóknar.
Matsaðili undirbýr og framkvæmir úttekt út frá EQM matseyðublöðum. Úttektin felst í heimsókn til fræðsluaðila þar sem sjálfsmat er sannreynt og verkferlar skoðaðir.
Matsaðili skilar fræðsluaðila skýrslu eins fljótt og auðið er með ábendingum um það sem betur má fara og tilmælum um úrbætur þar sem þess er þörf.
Fræðsluaðili vinnur úrbótaáætlun og fær hana samþykkta hjá matsaðila. Ekki mega líða meira en 2-7 virkir dagar frá því að fræðsluaðili skilar inn úrbótaáætlun þar til svar berst frá matsaðila um samþykkt eða synjun áætlunarinnar.
Ef fræðsluaðili stenst ekki mat, fær hann leiðsögn og skilgreindan frest hjá matsaðila til að gera umbætur fyrir næstu matsheimsókn (aukaheimsókn er ekki innifalin í árgjaldi).
Að loknu úrbótaferli (ef við á) og aukaheimsókn (sé þess þörf) tilkynnir matsaðili Fræðslumiðstöð atvinnulífsins hvort skilyrði vottunar hafi verið uppfyllt og staðfestir hvaða svið starfseminnar vottunin nær yfir.
FA afhendir fræðsluaðila viðurkenningarskjal sem staðfestir vottunina og sendir honum EQM gæðamerkið á rafrænu formi. Fræðsluaðili skuldbindur sig til að nota merkið í samræmi við reglur um notkun.
Fræðsluaðili yfirfer sjálfsmat sitt árlega og sendir Fræðslumiðstöð atvinnulífsins upplýsingar um breytingar sem hafa orðið á starfseminni og gæðastjórnun fræðslustarfsins.
