Þjóðfélagslegur kostnaður vegna brotthvarfs úr námi á framhaldsskólastigi

Samtök sveitarfélaga á höfuðborgarsvæðinu birtu í mars sl. skýrslu um þjóðfélagslegan kostnað af brothvarfi úr námi á framhaldsskólastigi.  Samkvæmt niðurstöðum höfundar er núvirtur þjóðfélagslegur kostnaðuraf brotthvarfi eins nemenda úr námi á framhaldsskólastigi 14 milljónir króna á verðlagi ársins 2012.

Núvirtur þjóðfélagslegur kostnaður af brotthvarfi eins nemanda úr námi á framhaldsskólastigi er 14 milljónir krónur á verðlagi ársins 2012. Áætlað er að 29,2% af nýnemum séu horfnir frá námi fjórum árum eftir innritun. Þá voru 4.305 einstaklingar á 16. aldursári sem stunduðu nám á framhaldsskólastigi 2012. Miðað við að 1.259 þeirra hverfi frá námi er þjóðfélagslegur kostnaður af brotthvarfi þess árgangs 17,7 milljarðar króna. Eftir að tekið hefur verið tillit til þess að annars vegar verður aldrei spornað við brotthvarfi allra, og hins vegar að hluti þeirra mun ljúka námi seinna, standa eftir 10,1 milljarður af þjóðfélagslegum kostnaði. Ef einungis er horft til þeirra sem eru á höfuðborgarsvæðinu er sú tala rúmlega 6,1 milljarðar. Ef miðað er við að 19,5% af öllum nemendum sem stunda nám á framhaldsskólastigi hverfi frá námi á hverju ári mun brotthvarf árið 2012 vera 4.954 nemendur. Þjóðfélagslegur kostnaður af brotthvarfi nemenda 2012 er þá 52,4 milljarðar króna. Þar af er 32,1 milljarður á höfuðborgarsvæðinu. Sá hluti sem aðgerðir til þess að sporna gegn brotthvarfi gætu haft áhrif á er 44,9 milljarðar. Af því er hlutinn sem á við brotthvarf á höfuðborgarsvæðinu 27,6 milljarðar króna.

Skýrslan var unnin af Eyjólfi Sigurðssyni fyrir SSH og er hluti af verkefninu "samvinna skólastiga frá leikskóla að háskóla" í verkefnaflokknum Skólar og menntun í fremstu röð, en hann er hluti af Sóknaráætlun fyrir höfuðborgarsvæðið 2013.

Skýrsluna alla má nálgast HÉR.